13-வது சட்டத்திருத்தத்தை அமல்படுத்தவும் மாகாணசபை தேர்தலை நடத்தவும் ரணிலுக்கு வலியுறித்திய பிரதமருக்கு நன்றி என அண்ணாமலை தெரிவித்துள்ளார்.
தமிழகத்துக்கும், ஈழத்துக்கும் உள்ள கலாசார பாரம்பரியத்தை புதுப்பித்த பிரதமர் மோடிக்கு நன்றி தெரிப்பதாக தமிழக பா.ஜ.க. தலைவர் அண்ணாமலை கூறியுள்ளார். இது தொடர்பாக அவர் வெளியிட்டுள்ள அறிக்கையில் கூறப்பட்டு உள்ளதாவது:-
2 நாள் பயணமாக இந்தியா வந்துள்ள இலங்கை அதிபர் ரணில் விக்ரமசிங்கே, பிரதமர் நரேந்திர மோடியை நேரில் சந்தித்து உரையாடினார். இலங்கை தமிழ் மக்கள் வாழ்வு மேம்படவும், அவர்களின் பொருளாதாரம் வளர்ச்சி பெறவும், பல்வேறு திட்டங்களையும் நிதி உதவிகளையும் தொடர்ந்து செய்து வரும் பிரதமர் மோடி தலைமையிலான நமது மத்திய அரசு, தொடர்ந்து செய்யவிருக்கும் பணிகள் குறித்து இந்த சந்திப்பில் முடிவாகின.
இந்தியாவுக்கும், இலங்கைக்கும் இடையேயான விமான போக்குவரத்தை அதிகரிக்க முடிவு செய்யப்பட்டுள்ளது. இதன்மூலம், இலங்கை தமிழர்கள் பகுதியில் சுற்றுலா, தொழிற்துறை மற்றும் பொருளாதார வளர்ச்சி மேம்படும். மேலும், தமிழகத்தின் நாகப்பட்டினம் மற்றும் இலங்கையின் காங்கேசன்துறை இடையே பயணிகள் படகு சேவையை தொடங்க பிரதமர் மற்றும் இலங்கை அதிபர் ரணில் விக்ரமசிங்கே இடையேயான ஒப்பந்தம் கையெழுத்தாகியுள்ளது.
ஈழத்துக்கும், தமிழகத்துக்கும் உள்ள தொடர்பு சங்க காலம் முதலே தொடர்ந்து வருவது சங்க இலக்கியமான பட்டினப்பாலையில், ஈழத்து உணவும் காழகத்து ஆக்கமும் பூம்புகார் துறைமுகத்தில் குவிந்து கிடந்தன என்று குறிப்பிடப்பட்டுள்ளது. அத்தகைய தொன்மையுள்ள தமிழகம்-இலங்கை இடையேயான கப்பல் போக்குவரத்துத்தொடர்பு, 1960-களில் ஏற்பட்ட புயலால் பாதிக்கப்பட்டு நிறுத்தப்பட்டது.
இலங்கையின் உள்நாட்டுப் போரினால் பாதிப்படைந்த இலங்கை காங்கேசம் துறைமுகத்தை பிரதமர் மோடி தலைமையிலான மத்திய அரசு ரூ.287 கோடியில் புதுப்பித்து, தற்போது மீண்டும் தமிழகம்-இலங்கை இடையேயான கப்பல் போக்குவரத்தை தொடங்க உள்ளது. வரலாற்று சிறப்புமிக்க தமிழர்கள் பாரம்பரியமும், ஈழத்தமிழர்களுடனான கலாச்சார தொடர்பும் புதுப்பிக்கப்பட்டுள்ளது. மேலும், தமிழ் மீனவர்களின் வாழ்வாதாரம் தொடர்பான பிரச்சினைகள் குறித்தும், இந்த விஷயத்தில் மனிதாபிமான அணுகுமுறையுடன் செயற்பட வேண்டும் என்றும் பிரதமர் மோடி, இலங்கை அதிபரை வலியுறுத்தியுள்ளார். இலங்கையில், சீரமைப்பு மற்றும் நல்லிணக்க பணிகளை இலங்கை அரசு நிறைவேற்றவும், இலங்கை தமிழர்களின் அதிகார பகிர்வை உறுதி செய்யும் 13-வது சட்டத்திருத்தத்தை அமல்படுத்துதல் மற்றும் மாகாணசபை தேர்தலை நடத்துதல் என்ற தனது உறுதிமொழியை நிறைவேற்றவேண்டும் என்றும், இலங்கை தமிழ் மக்கள் மரியாதை மற்றும் கண்ணியமான வாழ்க்கையை உறுதி செய்யவேண்டும் என்றும் இலங்கை அதிபரிடம், பிரதமர் மோடி கேட்டுக்கொண்டார்.
இந்தியா-இலங்கை உறவு, சிறப்பு முக்கியத்துவம் வாய்ந்தது. இந்தியாவிலிருந்து தமிழர்கள், இலங்கையில் குடியேறி, 200 ஆண்டுகள் நிறைவடைந்துள்ளன. இரு நாடுகளிடையேயான தூதரக உறவை நிறுவி 75 ஆண்டுகள் நிறைவடைந்துள்ளன. இந்த கலாசார உறவை மேலும் பெருமைப்படுத்தும் வகையில், இலங்கையில் உள்ள தமிழர்களுக்காக ரூ.75 கோடி மதிப்பிலான பல்வேறு திட்டங்களை, பிரதமர் மோடி அறிவித்துள்ளார். மேலும், இலங்கையின் வடக்கு மற்றும் கிழக்கு பகுதிகளின் வளர்ச்சி திட்டங்களில் இந்தியாவின் பங்களிப்பும் இருக்கும் என்று உறுதியளித்துள்ளார். இலங்கையில் வாழும் தமிழ் மக்கள் நலனுக்காக தொடர்ந்து பல திட்டங்களை செயல்படுத்தி, தமிழகத்துக்கும், ஈழத்துக்கும் இடையே உள்ள கலாச்சார பாரம்பரியத்தை மீட்டு புதுப்பித்திருக்கும் பிரதமர் மோடிக்கு, தமிழக மக்கள் சார்பாகவும், தமிழக பா.ஜ.க. சார்பாகவும் மனமார்ந்த நன்றிகளை தெரிவித்துக்கொள்கிறேன்.” இவ்வாறு அதில் கூறப்பட்டுள்ளது.
33 வருடங்களுக்கு முன்னர் தமிழ் மக்களால் எதுவுமற்ற தீர்வு என நிராகரிக்கப்பட்ட 13 வது திருத்த சட்டத்தை வலியுறுத்துவதையே ஒரு சாதனையாக பேசுகின்ற பாஜக வை பார்த்து கடுமையான விமர்சனங்கள் எழுந்துள்ளன.
