தமிழ்நாடு, மதுரை திருமங்கலம் அருகே உள்ள உச்சப்பட்டி ஈழத்தமிழர் முகாமில் வசித்து வருபவர் சத்தியராஜ் (34). இவர் வர்ணம் பூசும் தொழிலைச் செய்து வருகின்றார். இவருக்கு சுகன்யா (30) என்ற மனைவியும், மதுமிதா (12) மற்றும் ஓவியா (8 ) என்ற இரு மகள்களும் உள்ளனர்.
கடந்த சில நாட்களாக நாகப்பட்டின மாவட்டம் வேளாங்கண்ணி மாதா கோவிலில் வர்ணம் பூசும் பணி செய்து வந்தார். இவ்வாறு இருக்கையில் கடந்த 06.08.2023 அன்று இரவு 1 மணியளவில் 30 அடி உயரத்தில் கம்பி சாரத்தின் மேல் நின்று வர்ணம் பூசும் பணியில் ஈடுபட்டிருந்த போது, எதிர்பாராத விதமாக திடீரென கம்பி சாரம் முறிந்து கீழே விழுந்ததில் பலத்த காயம் ஏற்பட்டு மயங்கிய நிலையில் அக்கம் பக்கத்தில் இருந்தவர்களால் உடனடியாக மீட்கப்பட்டு நாகப்பட்டினம்
அரசு மருத்துவமனையில் சேர்க்கப்பட்டு சிகிச்சை பெற்று வந்த நிலையில் நேற்றைய தினம் (07.08.2023) காலை 4:30 மணியளவில் சிகிச்சை பலனின்றி உயிரிழந்து விட்டார்.
இவரது உடலை நாகப்பட்டின அரசு மருத்துவமனையிலிருந்து அவரது வாழ்விடமான மதுரை உச்சப்பட்டி ஈழத்தமிழர் முகாம் கொண்டுவந்து நல்லடக்கம் செய்வதற்கு தகுந்த உதவி செய்ய வேண்டுமென அவரது குடும்பத்தினர் கோரிக்கை வைத்துள்ளனர்.
மேலும், சத்தியராஜ் அவர்களை இழந்து வாடும் அவரது மனைவி மற்றும் மகள்கள் இருவருக்கும் அவர்களின் எதிர்கால வாழ்வாதாரத்திற்காக நிவாரண உதவி அளிக்கப்பட வேண்டுமென, மாவட்ட நிர்வாகம் மற்றும் தமிழக அரசிடம் சமூக ஆர்வலர்கள் பலரும் வலியுறுத்தி வருகின்றனர் என்பது குறிப்பிடத்தக்கது.
