நிலவை நோக்கி விண்ணில் பாய்ந்தது சந்திரயான் – 3 விண்கலம்..!

ஸ்ரீஹரிகோட்டாவில் இருந்து சந்திரயான் – 3 விண்கலம் நிலவை நோக்கி விண்ணில் பாய்ந்தது.

விண்ணில் பாய்ந்தது சந்திராயன் – 3

‘சந்திரயான் 3’ விண்கலத்தில் உள்ள ‘இன்டர்பிளானட்டரி’ என்ற எந்திரம் 3 முக்கிய பகுதிகளை கொண்டுள்ளது. ராக்கெட்டில் உள்ள ‘புரபுல்சன்’ பகுதி விண்கலத்தில் உள்ள ரோவர், லேண்டர் பகுதியை நிலவில் 100 கி.மீ. தொலைவுக்கு கொண்டு செல்லும் வகையில் வடிவமைத்து பொருத்தப்பட்டு உள்ளது.

பின்னர் லேண்டர் பகுதி நிலவில் மெதுவாக தரையிறங்கும் பகுதியாகும். ரோவர் பகுதி நிலவில் ஆய்வு செய்யும் கருவியாகும். இந்த 3 பகுதிகளுக்கும் இடையே ரேடியோ அலைவரிசையும் பரிசோதிக்கப்பட்டு உள்ளது.

ராக்கெட்டை விண்ணில் ஏவுவதற்கான 25 1/2 மணி நேர கவுண்டவுன் நேற்று தொடங்கியது. முழுமையாக கவுண்டவுன் முடிந்தவுடன் ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தில் உள்ள 2வது ஏவுதளத்தில் இருந்து, இன்று மதியம் 2 மணி 35 நிமிடம் 17 வினாடியில் ராக்கெட் விண்ணில் பாய்ந்தது.

ஆகஸ்ட் 23 அல்லது ஆகஸ்ட் 24 ஆம் தேதி தரையிறங்கும்

நிலவுக்கு அனுப்பப்படும் இந்தியாவின் 3-வது விண்கலமான ‘சந்திரயான்-3’, விண்வெளி ஆய்வில் இந்தியாவை அடுத்தக் கட்டத்திற்கு எடுத்து செல்லும் என எதிர்பார்க்கப்படுகிறது

விண்ணை நோக்கி செல்லும் சந்திரயான் 3 விண்கலம் 16 நிமிடங்களில் புவியின் சுற்றுவட்ட பாதையில் நிலைநிறுத்தப்படும் என விஞ்ஞானிகள் தெரிவித்துள்ளன. ஆகஸ்ட் 23 அல்லது ஆகஸ்ட் 24 ஆம் தேதி தரையிறங்கும் என எதிர்ப்பார்க்கப்படுகிறது.

நிலவின் தென்துருவம் பற்றி ஆய்வு செய்ய சந்திரயான் 3 விண்கலம் விண்ணில் செலுத்தப்பட்டுள்ளது. நிலவின் பரப்பில் இருக்கும் வெப்பநிலை, மண்ணின் தன்மை பற்றி ஆராய்கிறது சந்திரயான் 3.

மின்னுாட்ட அதிர்வுகள், நிலநடுக்க அதிர்வுகள், தட்பவெப்ப நிலை குறித்தும் ஆய்வு செய்கிறது சந்திரயான் 3. லேண்டர், ரோவர் உள்ளிட்டவற்றுடன் சந்திரயான் 3 நிலவின் தரைப்பரப்பை ஆய்வு செய்யும் என்று விஞ்ஞானிகள் தெரிவித்துள்ளனர்.