தியாகதீபம் திலீபனின் நினைவூர்தி மேலான சிங்கள பௌத்த குண்டர்களின் தாக்குதலைக் கண்டித்து முற்றுகைப் போராட்டம்
காலம்: புதன்கிழமை September 20, 2023
நேரம்: மதியம் 12 மணி தொடக்கம்
இடம்: இலங்கை தூதரகம் (01, Eglinton Avenue East, Suite No 501, Toronto, Ontario, M4P 3A1)
டொரண்டோ: தியாகதீபம் திலீபன் அவர்களின் நினைவூர்தி திருகோணமலையில் அமைந்துள்ள கப்பல்துறை ஊடாக பயணித்துக் கொண்டிருந்த தருணத்தில் பொலீசார் மற்றும் உளவுத்துறையினரால் ஒன்றிணைக்கப்பட்ட சிங்களக் காடையர்கள் நினைவூர்தியையும் தாக்கி தமிழ் பாராளுமன்ற உறுப்பினரான செல்வராஜா கஜேந்திரன், சட்டத்தரணி காண்டீபன் உட்பட பல தேசிய செயற்பாட்டாளர்களை மிலேச்சத்தனமாக தாக்கியும் காயப்படுத்தியும் உள்ளார்கள்.
அடக்கப்பட்ட தமிழ்த் தேசிய இனத்தின் விடிவெள்ளியான தியாகதீபம் திலீபன் அவர்கள் தன் இன மக்களுக்காக அகிம்சை வழியில் போராடி உயிரீந்து, உலகிற்கு ஈகத்தின் ஒரு குறியீடாக விளங்குகின்றார். அந்தத் தியாகதீபம் திலீபன் அவர்களின் திருவுருவம் தாங்கிய ஊர்தியை அடித்து உடைத்ததுடன் தமிழ்த்தேசிய செயற்பாட்டாளர்களையும் தாக்கிச் சிங்கள இனவாதம் இனவழிப்பின் கோர முகத்தைக் காட்டியுள்ளது.
தமிழ் மக்களுக்கெதிராக தொடர்ச்சியாக சிங்கள பேரினவாதிகள் தொடுக்கும் கட்டமைக்கப்பட்ட இனவழிப்பு நடவடிக்கைகளில், தமிழ் மக்களின் கூட்டு நினைவு கூர்தலை தடுப்பது மற்றும் அது அடுத்த தலைமுறைக்கு சென்றடையக்கூடாது என்பதில் இலங்கை அரசும், சிங்கள பவுத்த பேரினவாதிகளும் தொடர்ந்தும் முனைப்புடனே இருக்கின்றார்கள். தமிழ் மக்கள் சிங்கள பேரினவாதிகளின் இம்முயற்சியை தொடர்ந்தும் முறியடிக்க வேண்டும் என்பது எமக்கான ஒரு வரலாற்றுக் கடமையாகும்.
“அடக்குமுறையின் தீவிரத்தை இன்று நாம் உணரத் தவறினால், நாளை நாம் மிக மோசமான நிலைக்குத் தள்ளப்படுவோம்.” – தியாகதீபம் திலீபன்
நாம் அனைவரும் டொரண்டோவில் உள்ள இலங்கை தூதரகம் முன்பாக வரும் புதங்கிழமை மதியம் 12 மணிக்கு அணிதிரண்டு முற்றுகைப் போராட்டத்தை நடத்துவோம்.
கனடியத் தமிழர் சமூகம், மாணவர் சமூகம்
